Psa 34 | NdeIBE | STEP | ElikaDavida. Lapho azitshaya uhlanya ku-Abhimeleki, owamxotshayo wahamba. Ngizamphakamisa uJehova ngezikhathi zonke; indumiso yakhe izahlala isezindebeni zami.

Psalms 34

1 Ngizamphakamisa uJehova ngezikhathi zonke; indumiso yakhe izahlala isezindebeni zami.

2 Umphefumulo wami uzancoma uJehova; akuthi abahluphekayo bezwe bajabule.

3 Bongani uJehova kanye lami; kasiphakamiseni ibizo lakhe kanyekanye.

4 Ngamdinga uJehova wangiphendula; wangikhulula kukho konke engangikwesaba.

5 Labo abakhangele kuye bayakhazimula; ubuso babo bungeke bembeswe lihlazo.

6 Isihlupheki lesi samemeza, uJehova wasizwa; wasisindisa kuzo zonke izinhlupheko zaso.

7 Ingilosi kaJehova iyabazungeza labo abamesabayo, ibakhulule.

8 Nambithani libone ukuthi uJehova ulungile; ubusisiwe umuntu ophephela kuye.

9 Mesabeni uJehova, lina bangcwele bakhe, ngokuba labo abamesabayo kabasweli lutho.

10 Izilwane zingaphela amandla zilambe, kodwa labo abamfunayo uJehova kabasweli lutho oluhle.

11 Wozani, bantwabami, lalelani kimi; ngizalifundisa ukumesaba uJehova.

12 Noma ngubani kini othanda impilo, ofisa ukubona izinsuku ezinhle ezinengi,

13 nqanda ulimi lwakho ebubini lezindebe zakho zingakhulumi amanga.

14 Tshiya ububi wenze okulungileyo; funa ukuthula ukunxwanele.

15 Amehlo kaJehova akhangele abalungileyo lezindlebe zakhe ziyezwa ukukhala kwabo;

16 ubuso bukaJehova bumelana labenza okubi, ukuba acitshe ukukhunjulwa kwabo emhlabeni.

17 Abalungileyo bayakhala kuJehova abezwe; uyabakhulula kuzo zonke izinhlupheko zabo.

18 UJehova useduze labo abalezinhliziyo ezephukileyo asindise labo abadabukileyo emoyeni.

19 Umuntu olungileyo angaba lezinhlupheko ezinengi, kodwa uJehova uyamkhulula kuzo zonke.

20 Uyawavikela wonke amathambo akhe, kungephuki loba lalinye.

21 Ububi buzambulala oyisixhwali; izitha zolungileyo zizalahlwa.

22 UJehova uyazihlenga izinceku zakhe; kakho ozalahlwa ophephela kuye.